Wo do zämecho sind zu däm ganz bsundere Fäscht
Wär hetti sich vor äs paar Johr no träume loh
Das mir mol zum Bächti siim Hochsig chönd zämecho
Dä Bächti hätt sich z’China umegärgeret, fascht vier Johr
Mir händ dänkt das er dötte bliibt seg die gröschti Gfohr
Mängmol hätt er dänkt, für was tue ich mich so schinde?
Bächti du häsch z’China müeese die richtig Frau go finde.
Chli lasch und schtier isch sie dehärcho, d’Hochsigszeremonie
Und die meischte Gäscht sind hütt Morge nonig debii gsii.
Dä Sibo und ich händ üüs dänkt, sonä Zeremonie isch wichtig
drum traued mir Eu nomol, aber das mol richtig!
D’Cici isch nöimed ganz wiit i dä Främdi dihei
Sie chunnt us äm färne und riesige Shanghai
Sie weiss nid vill über äm Peter sini Jugendsünde
Drum tüend mir äs paar devo, ganz offiziell verkünde.
Ich hoff d’Cici lärnt schnäll wie mä äs Füür lösche tuet
Und wie mä cha bändige ä loderndi Gluet.
S’einzig Füür wo bim Lagerfüürmaa cha ohni Kontrolle sii,
isch das vo dä Liebi, aber das märkt sie glii.
Wo dä Peter no än chliine Bueb gsii isch,
hätt er amigs siis Sackgeld uusgleit uf äm Tisch
hätt uusgrächnet was Raider und Snickers tüend choschte
und isch dänn mit äm Reschte, Frauefürz go poschte
Mit Frauefürz cha mä schtopfe ä Schpielzüügkanone
Das miech mä besser dusse, nid dött wo mä tuet wohne
Gschosse hätt er mit däne im ganze Zimmer ume
D’Munition wür mä aber gschiider verruume
Ein Frauefurz hätt nämmli d’Munitionschischte troffe
Vo dött aa isch’s ganze chli us äm Rueder gloffe.
Glüehigi Teili flüüged im ganze Zimmer umenand
Wänn d’Ursi zruggdänkt macht sie hütt no än Handschtand
Dä Bächti hätt gseh, dass uf äm Teppich überall glimmt
Do mue mä handle und zwor sofort! Das schtimmt.
Är rännt und will d’Misere mit äm Schtaubsuuger iisuuge
Vo dött aa grooted die Sach aber no ganz us dä Fuuge
Dä Schtaubsuuger rüücht und flüügt im Boge zum Fenschter use
S’Zimmer gseht uus! S’isch würkli zum gruuse
Teppich und Suuger kaputt und d’Mueter isch sauer
Siit dött hätt’s i däm Zimmer Linoleum , ich glaub da isch schlauer
Eimol hätt er dä Rollschtuel vo dä Grosi uusprobiert
Und än zu siim persönliche Füürschtuel lanciert
Är hätt welle, ohni Brämse um d’Kurve, hämmer ghört brichte
Siin Daddy hätt nochher z’tue gha zum dä Roolschtuel wieder richte.
Mit heisse Reife fahre isch au schpööter no ä Liideschaft blibe
Das wär jo keis Problem wänn mäs nid immer grad täät übertriibe
Mit quietschende Reife s’Dorf ab und uf kurve, wär jo no gliich
Aber no vor dä Huusmuur brämse wär besser gsi, glaub ich.
Als Schtromerschtift hätt er z’Schlaate dä Chindsgi saniert
Z’nacht hätt er brännt, was isch ächt passiert?
D’Schuld hätt mä ihm dänn aber nie chönne nohwiise
Aber s’Gegetei hätt er au nid würkli chönne bewiise
Nachfüllbari Füürzüüg sind um dä Bächti ume ä grossi Gfohr
Da ahni höchschtpersönlich usegfunde, vor villne Johr
Wänn mä vorne äs Flämmli hätt und hinne Gas inetruckt
Git’s ä Stichflamme ä riesigi, das isch ganz verruckt
Sini erscht eige Wohnig isch i dä Adlergass z’Fürthale gsi
Aber er hätt dänn müesse zügle, scho ziemlich glii
Ich hoff wa er dött glärnt hätt, tuet sich im Läbe bewähre
Mä sött nämli nid grad noch äm Rauche, dä Äschebächer lääre
Eis rauche, Äschebächer lääre und zum Huus use ränne
Dä Chübel fangt unbemerkt aber heftig aa bränne
Gottseidank platzt vo dä Hitz d’Boilerleitig und löscht dä Brand
Dä Bächti hätt mol wieder meh Glück als Verschtand
Vill isch kaputt gange und alls isch voll Ruess
Jede vo siine Fründe ame Obig aatanze mues
Die einte butzed d’Cd’s mich hätts mit dä Kabelsammlig troffe
Kilometerwwis Kabel sind dur mini Händ dure gloffe
Au anere Kafimaschine cha mä guet umemanipuliere
Dä Thermosstaat uusschalte oder susch irgendwie frisiere
D’Maschine hätt z’heiss gha, isch gschmolze, zur Unkenntlichkeit verboge
Aber bevor s’hätt chönne bränne isch sie zum Fänschter uusgfloge
Wo är z’Shanghai gsi isch, hätt mä vo Hotelbränd ghört
Und d’Buschbränd z’Auschtralie händ au chli verschtört
Wänn’s neumed brännt und dä Bächti isch i däm Land
Fangt mä aa spekuliere da liit halt uf dä Hand
Ich hoff mir händ d’cici chli chönne über Gfohre ufkläre
Und sie tuet sich dänn nid im Nochhinein no beschwäre
Üüs allne und ihre isch dä Bächti sicher lieb und tüür
Aber s’isch und bliibt chli äs Schpiil mit äm Füür
Mir dänked dass sie sich’s nid anderscht überlegge tuet
Und immer no zum jo säge, findet dä Muet
Ich übergib äm Pater Sibonus, Wort und Regie
Damit er cha starte, die grossi Zeremonie